Espazo vivo

Dicía “Zeca” Afonso  ‹‹Eles comem tudo E não deixam nada›› nunha canción titulada “Os Vampiros”, composta a finais dos anos 50. Esta expresión reflicte á perfección a súa postura con respecto á tauromaquia. Vostedes están a empregar recursos públicos dun xeito sistemático ata deixar á cidadanía sen uns recursos prioritarios para a loita contra, por exemplo, o desemprego xuvenil e os desafiuzamentos. José converteuse anos máis tarde nun símbolo contra a Dictadura de Salazar.

Soprende ler o contido da súa soflama proviolencia enviada aos grupos do Parlamento de Galiza. E sorprende porque na nosa terra somos unha maioria abrumadora a que reclamamos a fin destes espectáculos. Quizais por mor do seu alonxamento tradicional da Sociedade non se decataron que dende o ano 1981 o territorio galego posúe un Parlamento propio e non é unha provincia máis de Madrid, quizáis tiveran o mesmo problema coa tramitación da ILP abolicionista en Cataluña, que tiñan un espazo de representación electoral, o Parlament, que lles estorbaba un pouco.

Tampouco deixa de sorprender que as súas declaracións cara os voceiros dos Grupos Parlamentares se dirixan a constituir unha uniformidade moral a prol da tortura dos animais como arte, cultura ou calesquera outros adxetivos para o que constitúe unha morte sanguinolenta dun hervíboro, un animal que non mata nin para comer.

O propio Ministerio de Cultura, o que vostedes frecuentan con asiduidade para facer o exercicio de pedir, reflicte na súa última enquisa de “Hábitos e Prácticas Culturais” do periodo 2010-2011 que o 99,2% dos galegos e galegas non asistiron a festexo taurino algún. Mostra dun grande espectáculo de masas supoñemos, pero de seguro unha cantidad ostensiblemente inferior aos votos que recolleron nas pasadas Eleccións á Xunta de Galiza as forzas netamente abolicionistas, como o BNG, ao que vostedes chaman catetos, asquerosos ou fillos de puta nas redes sociais, e Alternativa Galega de Esquerda. Tamén teríamos que sumar os votos de 10 dos 18 deputadas e deputados do PSdeG que asumiron un compromiso coa plataforma Galicia, Mellor Sen Touradas e impulsaron a Fronte Antitaurina na propia cámara.

Agardamos tamén o seu rexeitamento ás ameazas e insultos que están a recibir os lexítimos representantes do pobo galego, que foron escollidos nun proceso electoral regrado. Porque xa que vostedes defenden a liberdade para torturar animais e poder desfrutar dunha tarde de sangue e sol, entendemos que tamén defenden a liberdade da maioría social para rexeitar esta actividade e artellar os mecanismos que pon nas súas mans o sistema parlamentar para impulsar o seu veto.

A súa retorica aburre, non nos ameace e moito menos se erixa en decisor do que os galegos e as galegas queremos.

Por certo, non faga alusión a estudos da Coruña, porque calqueira concelleiro da corporación ten acceso ao expediente da feira taurina, regulado por contrato público. Non quera espallar máis sorpresas da industria taurina cidade.